السلام عليكم, تحية لكل اعضاء المنتدى و لجميع الزوار ايضا. انا مزوجة هادي 8 سنين و عندي 2 وليدات كنعيش فالغربة .كنت ف بلادي عايشة مستقلة ماديا و معنويا "ماديا" حيت كنت خدامة موظفة في قطاع خاص و كنتخلص مزيان و"معنويا" حيت كنت ما كيتحكم في حد. بالحق كنت عارفة الحدود ديالي و كنت كاسبة الثقة ديال عائلتي. حتى شاءت الاقدار و تقدم لي راجلي, قلت ارا نتزوج شحال قدني نبقا هاكا و العائلة كل مرة كيحرجوني بديك الكلمة ديال العقبة ليك, تزوجت هاد السيد واخا عرفت انو ما كاينش تكافؤ فالمستوى الثقافي حيت كنقول كاين اللي واعي واخا ما يكونش قاري. هادا لقيتو ما قاري ما واعي زيادة على دلك هو كبر في ظروف قاسية جدا باقية مأثرة فيه لحد الآن خلاتو يكون اكبر صقرام. دابا ما نكدبش عليكم وليت كنحس براسي عايشة غير كناكل و كنشرب و كنضرب تمارة و من نهار جيت للغربة حاسة براسي غادية و كنتكلخ حيت الحياة ديالي منحصرة غير فهاد الدائرة و لوكان لقيت غير راحة البال و اللي يفهمني. راجلي من النوع اللي ايلا قال الشمس شرقت من الغرب خاصني نقول ليه كاينة عرفتي بقا كيقمعني و كيمارس علي جميع انواع العنف النفسي و جميع وسائل الترهيب ايلا درجة انه جردني من شخصيتي طفاني بهاد المفهوم. دابا انا حكيت ليكم غير النتيجة اللي وصلت ليها باش نحكي ليكم التفاصيل كيفاش كنغيش معاه و شنو شفت و دقت معاه خاصني اسبوع كل نهار نكتب عاد ايلا ساليت. دابا انا بالرغم من هادشي راني مسايرة معاه على ود ولادي و لكن دابا المشكيل تايبقاو في هما حيت كيعنفهم بزاف تصورو ولى ايلا دخل مع الباب, القلب ديالي كيتفزع و كنبقى فحالة تأهب و مخلوعة حتى كيخرج و دابا ولادي حتى هما مساكن. سمحولي ايلا طولت عليكم دابا بغيتكم تقويوني باش نزيد نصبر بغيت غير نتسنى حتى يكبرو ولادي ايلا حياني الله باش حتى ايلا تفرقت منو يكونوا عاقلين و شاهدين على كل ما دار. السلام عليكم.
↧