السلام عليكم و رحمة الله.اولا اتمنى لكم عيدا مباركا سعيدا.اعاده الله علينا و على الامة الاسلامية كافة باليمن و الصلاح و الهداية.اخواتي الغاليات اسالكن الرحمة لواحد السيدة توفات اليوم مباشرة بعد صلاة الجمعة. هاد السيدة تزوجات في سن صغيرة. و انجبت بعد سنوااات من العلاج سبحان الله.كانت صابرة بزاف و تتقول دائما يا رب ارزقني الذرية ان كان لي فيها خير.انجبت كيف قلت بعدما يئست تماما من الانجاب و رزقها الله ابنا.هاد الابن كبر و اصبح محاميا .و باش ما نطولش عليكم. هاد السيدة كانت نهايتها فدار العجزة.و كانت الى ساعة وفاتها تنعم بالصحة و ضحوكية و انيقة الله يرحمها و لكن كان قلبها عااامر و نفسيتها محطمة خصوصا فاش كنا نجمعوا من وجوه الخير و نتفكروهوم فالمناسبات كانوا غير يبداو المداحات فالمديح ما تتوقفش من البكا مسكينة و تنوض مسكينة بحال الى تتجدب مع انها انسانة قارية و عاشت فالعز.و لكن فاش توفى راجلها لعب عليها ولدها الحيلة و كركبها.حسبي الله و نعم الوكيل فيه. يا اخواتي نزلت للمغرب مع اسرتي نعيدوا مع حبابنا و مشينا شفنا هاد الناس مع وجوه الخير للي تيخدموا فالخفاء و كانت السيدة عيانة شوية مسكينة جاها وجع فكرشها عادي داوها للكلينيك و رجعات ما بيها ما عليها...هاد النهار تيعيطوا لي راه فلانة ماتت.يا اخواتي بكيت عليها بحال للي بكيت على واحد من حبابي.بقات فيا بزاااف و لكن فرحت لخاتمتها كيف حكاو ليا.هنيئا لابنها بسخط من الله.حرم راسو الجنة و رضات الوالدين.و للي يسمح فوالديه على ود الزوجة فعدمه خير من وجوده. كان عليها نقمة ماشي نعمة..اخواتي ربيو اولادكم على البر بالوالدين و على المساواة و على صلة الرحم.رحمك الله امي فاطمة و عوضك الله بالجنة.و للي بكاني اكثر انه اخر مرة شفناها فيها بغينا غير نشدوا فيها شوية باش تضحك قلنا ليها شنو للي نفسك فيها! ياكما نضربوها ليك بشي تزويجة..تنهدات مسكينة و ضحكات و قالت لينا و الله العظيم و بالحرف: انا عندي الخير فالاخرة تمة راحتي.و ربي استجب ليها من بعد كلامها بايام.للي دخلات تترحم عليها....جزاكن الله خيرا
↧